Çур ăшшине аса илсе

«Чăт-чăт, хăта...» — илемлĕ юрă

Палаткăра янрать кăна.

Шап-шурă тундра, пăрлă тундра,

Итлерĕ тимлесе ăна.

Чăваш çĕршывĕнче, тен, халĕ

Çеçке çурать пилеш-палан.

Кунта

Ват Хĕл Мучи сухалĕ

Шăлсах пырать çула хыçран.

«Чăт-чăт, хăта...» Чăтмашкăн хĕнччĕ.

Чăтма вĕрентрĕ юрă, тен...

Шур тундра тăрăх пин-пин ĕнчĕ

Сапатчĕ хĕл мăн арчинчен.

Вара кĕртсем çĕкленнĕçемĕн,

Аса илсе çур ăшшине,

Хуллен пуçлать çил ырă çемĕ —

Чайковскин

«Акăш ташшине».

Çĕнĕ комментари хуш