Вăрçă — вутлă-юнлă тĕпсĕр кӳлĕ...

Вăрçă — вутлă-юнлă тĕпсĕр кӳлĕ,

Çынсене çăтать вăл пинĕпе.

Тен, мана та пĕр-пĕр суккăр пуля

Çулса кайĕ вилĕм çавипе.

Ун чухне чĕлхем çинчен çĕкленĕ

Юлашки сăмахăм — сан яту.

Шантаратăп: паттăррăн вĕçленĕ

Вăрçăра туптаннă юрату.

Ман пулсан та, ан хурлан, чĕкеçĕм,

Макăрса каччушăн ан кулян, —

Чĕрӳне вăйпа хытар та эсĕ

Çапăçу хирне кайма тумлан.

Çĕнĕ комментари хуш