Электронлă вулавăш

Типсех пыраççĕ çăлкуçсем,

Хирти чечек таçта çухалчĕ.

Тунсăхпала путать пит-куç,

Тăван тавралăх-и ютланчĕ.

Ал çитменни пайтах касать,

Халь урăхла çынсен уйлавĕ.

Леш, кахал чирĕ-и асать,

Уйра-хирте кам пилĕк авĕ.

Çăл-куç шарлакĕсен сасси

Хир ĕçĕнче вăй-хал паман-и?

Юлташăм, çăл шывне асил —

Сипечĕ кăкăртах юлман-и?

Ачалăхра, сенкер ирпе,

Хĕвелпелех ĕçе васканă.

Шавланă сас тăван хирпе,

Яра куна вĕçленнĕ канăç.

Куç виçейми ана-çаран…

Несĕлĕмсен сăваплă çĕрĕ

Мĕскершĕн хăвăрт çаралан,

Сан куççульне курса кам йĕрĕ?

Салтак тӳми, утмăл турат…

Уй-хирĕмри тĕнче илемĕ.

Усал чи хитрине юмлать,

Пуянлăха хакпа тӳлемĕ.

Аванччĕ пулăхлă тăпра

Унпа пĕлсе усă курсассăн.

Сахал-им колхоза тупра

Вăл кӳнĕ. Эп сывлатăп ассăн.

Сăваплă вăл тăван уй-хир,

Авалтанах чăваш сумланă…

Çерем пăсса акайнă вир,

Çӳл тӳперен ыйтса юмланă.

…Кала, уй-хир, кам кӳрентерчĕ

Суха туса та хăвармасăр?

Чуна хуçать шеллев ӳкерчĕк,

Епле тăрайăн-ха курмасăр.

— Эпир чухне вăл капла марччĕ, —

Салхуланать çулташăм ман.

— Çухалчĕ çав этем юмарчĕ,

Е пирĕнти нисеп юлман?

Кунта хумханнă сарă тинĕс

Тыр-пул ани, тӳремĕ тикĕс.

Пучаххисе пĕксе куллен

Çĕн тухăç йăтăннă çуллен.

Турри-ши маннă чăваша,

Те хамăртах, юлташ, пур парăм.

Аттемĕрсен пилне ăша

Çителĕклĕ, тен, хываймарăн.

Çĕр çеç сана тăрантарать,

Тар тăкрăн тăк тумлантарать.

Ан ман: аçу-аннӳ çаранĕ

Пуласлăхăн сӳнми ыранĕ.

Йăлтах туять тăван уй-хир,

Чĕлхесĕр çеç, сăмах калаймĕ…

Ăсланăпăр-ши хăть эпир,

Пĕтмен-çке пирĕнте талайĕ.

Ĕçле, тар тăк эс акара,

Тыт выльăх-чĕрлĕх картара…

Ут тăван йышăн халĕпе,

Аттемĕрсен хавалĕпе.

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн