Электронлă вулавăш

Эс хитре. Çийĕнте

Ялкăшать пурçăн тум,

Кăтралатнă çӳçӳ

Сан питне эрешлет,

Илĕртӳллĕн кулать

Писевленĕ туту,

Ăнланатăп—саван,

Сана куншăн—рехмет.

Вальс кĕвви шăранса

Илтĕнсен вăйăра,

Эс мăнаçлăн пăхса

Çĕкленен чи малтан.

Авкаланчăк, чечен

Çаврăнан ташăра,

Сисĕнет: Ман пекки

«Урăх çуккă ялта».

Юрĕ. Урăх ан пултăр.

Тек кирлĕ те мар...

Кур епле ыттисем —

Пирĕн тантăшхĕрсем?

Лăпкăн, ăшшăн пăхни —

Яш чĕрешĕн кăвар,

Илемленнĕ ĕçре

Ытарми сăнĕсем.

Кашниех тăрашать

Ырă чунлă пулма,

Ĕççинче те — ĕçчен,

Вăйăра та кал-кал.

Пĕр эс çех вĕçкĕнле

Тыткалатăн хăвна,

Пĕр эс çех ĕççинче

Курăнатăн сахал.