Электронлă вулавăш

Куратăн-и мана,

кунтах эп,

илтетĕн-и мана,

кунтах эп.

Çулçă чăштăртатрĕ терĕн эсĕ,

эпĕ пултăм вăл,

çил уçăлтарчĕ терĕн эсĕ,

эпĕ пултăм вăл,

мĕлке терĕн эсĕ,

вăл та эпĕ пулнă.

Ĕненмесĕр тăрса итлерĕн,

шăрчăк чăрлатрĕ-ши, терĕн,

эпĕ сас патăм ăна.

çул çинчи тумхаха тапса ятăм терĕн,

мана тапса ятăн эсĕ,

утмăл турат çеçки татса илтĕм терĕн,

мана татса илтĕн эсĕ.

Кунтах эпĕ,

куратăн-и мана?

Кунтах эпĕ,

илтетĕн-и мана?

Сан умна çул тăсăлса выртнă, –

эпĕ вăл,

çăл куç çуталса выртать -

эпĕ вăл.

Çулна санне хура кушак татрĕ терĕн,

эпĕ пултăм вăл.

Сана аслати хутлатрĕ,

эпĕ пултăм вăл.

Курмастăн-и мана, кунтах эпĕ,

акă

шăнкăрав курăкĕнчен пуçа кăлартăм.

Ăçта тетне?

Пытантăм,

вуллине çеç чӳхентерсе хăвартăм.

Эп сан хыçрах,

эп сан умрах,

эп сан çумрах,

эп сан ăшунтах

çӳретĕп.

Телей те,

хур та

пĕр эпех

кӳретĕп.

Эс мана курасшăн,

эс мана тытасшăн.

Кунтах эпĕ,

куратăн-и мана?

 

1977, сентябрĕн 28-мĕшĕ, Никольское

Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —

Хаклав:

Шухăшĕ: --...вăйсăр...мухтамаллах   мар...вăйлă
Чĕлхе илемлĕхĕ: --...илемсĕр...чаплах   мар...илемлĕ
Содержанийĕ: --...ăшах...вăтам...тарăн