Ман савни

Алексей Воробьев | Сăвă | 1960 | савни | юрату | 585


Ик куçу сан — икĕ хурлăхан,

Йăм-хура та хĕлхемрен хĕлхем.

Йăм-хура пулсан та, ан хурлан,

Саншăнах, савни, çунать чĕрем.

 

Яштака пĕвӳ сан — шур хăва:

Тăхăнатăн шур кĕпе ялан.

Ан çунтар мана эс, пĕл хăвах —

Сăнăма сасартăк шуратан.

 

Тутусем сан — пиçнĕ пĕрлĕхен,

Хĕрлĕ сăнлă çырлапа пĕрех.

Чуптума — савсассăн — ан хĕрхен,

Туту пулĕ тата хĕрлĕрех.

 

Çӳçӳ санăн хум пекех кăтра,

Хумхатса тăратăн кăмăла.

Кăтруна çил уçнă вăхăтра

Ман чуна кам уçĕ-ши, кала?

 

Аллусем сан çепĕç те ĕçчен,

Ачашпа ӳсмен эс ачаран.

Каччуна сан ачашлас килсен,

Мĕншĕн эс, савниçĕм, вăтанан?

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: