Электронлă вулавăш

Халь анчах ачасемччĕ... Асил:

Ăшă-ăшă йăва — тăван кил!

Юнашарччĕ атте, çумрахчĕ анне —

Манас çук пехилне ĕмĕрне.

Çур иртет, çу килет, кĕр çитет —

Сисейместпĕр те, ĕмĕр иртет.

Канашлар-и пĕрре, пухăнар-и пĕрле?

Шăнкăрав, тăвана евитле!

Халь анчах çамрăксемччĕ эпир,

Пурнăç çулĕ ун чух — шурă пир.

Çĕмĕртсем — çеçкере, юрату — чĕрере.

Эх, килесчĕ çав вăхăт тепре...

Çур иртет, çу килет, кĕр çитет —

Сисейместпĕр те, ĕмĕр иртет.

Канашлар-и пĕрре, пухăнар-и пĕрле?

Кĕрекем, туссемпе эс кĕрле!

Çур иртет, çу килет, кĕр çитет —

Сисейместпĕр те, ĕмĕр иртет.

Канашлар-и пĕрре, пухăнар-и пĕрле?

Тăхта, ватлăх. Пире ан йĕрле!