«Çак тĕнчерех такамăн терчĕ...»

Çак тĕнчерех такамăн терчĕ,

Такам — хаваслă, ахăртне,

Улмалăх тăкрĕ те пĕтерчĕ —

Хĕле кĕрес чух — улмине.

Каллех туятăп — кĕвĕç евĕр,

Варли шанман пек варлине —

Кĕр кунĕн кăмăлсăр пуплевĕ

Пĕр маншăн çеç те маррине.

Ешентĕн пуль, кĕр, каçăн-ирĕн

Ман кăмăла сыхла-сыхла.

Пăхар та иккĕн хире-хирĕç

Сĕм кантăк витĕр — тунсăхлар.

Йĕрсен-йĕрсен, куççуль те типĕ,

Кулсассăн, кулă типĕ... Кул!

Таçта пĕрремĕш юр пĕрчи пек

Çуралчĕ çĕнĕ юрату.

Çĕнĕ комментари хуш