Пĕрремĕш юрату хăвачĕ

Кашни çыннах пуль тӳпене çĕкленĕ

Пĕрремĕш юратун ачаш çуначĕ.

Чунтан савса пурте пуль ĕмĕтленнĕ

Сӳнмест тесе чăн юрату кăвайчĕ.

Пирĕншĕнех пуль çăлтăрсем çутайнă

Асамлă юратун вĕри хăвачĕ.

Ют куçсенчен пурне те хупăрланă

Çуркуннепе шур çĕмĕртĕн турачĕ.

Нумай чухне пуль çунайса кĕлленнĕ

Пĕрремĕш юратун ачаш çуначĕ.

Теме пула ытла та час сӳнейнĕ

Кĕтмен çĕртен, чăн юрату кăвайчĕ.

Пулман пулсан çак ытарми çут туйăм,

Пĕрремĕш юратун манми саманчĕ —

Чĕресенче, тен, çунаймасчĕ çулăм...

Çавна пулах этемĕн пур хăвачĕ!

Çĕнĕ комментари хуш