Марине

Шăпчăк тейĕн Марине —

Ирхине ирех тăрать.

Пĕчĕкçĕ чĕпĕсене

Вăрттăн чăпăрт! чуптăвать.

— Çирĕп ӳс! Хăвăрт ӳс! —

Якатать тĕкĕсене.

Чĕкеç тейĕн Марине —

Питĕ калаçма ăста.

Пĕчĕкçĕ чĕпĕсене

Йыхăрать вăл апата:

— Чип-чип-чип! Чип-чип-чип!

Килĕрсемĕр ман пата.

Шăнкăрч тейĕн Марине —

Питĕ ырă, тарават.

Çитерет вăл вĕсене

Тутлă вир кĕрпи — апат.

— Пысăк пул! Тутă пул! —

Хăналать тусĕсене.

Çĕнĕ комментари хуш