Президент бульварӗ еннелле тухакан Правительство ҫуртӗнче пӗр стенд пирки мана пӗлтерчӗҫ — унта имӗш чӑваш чӗлхиллӗ текстра йӑнӑш нумай. Хайхи кайса курас терӗм. Чӑн та пур унашкал стенд. Правительство ҫуртне кӗнӗ вырӑнта чӑваш карттине вырнаҫтарнӑ тата республика пирки кӗскен калакан икӗ стенд ҫакса хунӑ. Пӗри, сулахай енчи — вырӑсла, тепри, сылтӑм енчи — чӑвашла. Шӑп та лӑп ҫав чӑвашла текстра йӑнӑш нумай та ӗнтӗ.

Пӗр енчен пӑхсан — ку стенда хатӗрлекенӗ чӑвашла пӗлменнине кӑтартать пуль теме пулать. Ҫавах та йӑнӑшӗсем ытларах вӗҫлекен абзацра пулнине шута илсен — кунта темле этемккесем ашкӑнни курӑнать. Вӗсен ӗҫӗ хыҫҫӑн текст ҫапларах пулса ларнӑ:

«Республик[а]н[ӑ] Ленин орденӗпе ([ ]935 ҫул), Октябрь Революций[е]н орденӗпе (1970 ҫул)», Халӑхсен туслӑх{се}н орденӗпе [(]1972 ҫул [)] нагр[ ]дӑлан[ ̆ ].»

Ку текста илсе панӑ чухне тӑваткал хӑлӑпра йӑнӑш вырӑнсене палӑртрӑм. Тӗпрен илсен, ӳкерчӗке пӑхсан хӑвсамӑрах куратӑр ӗнтӗ, тахӑшӗ(сем) саспаллисене хӑйпӑтнӑ е саспалли тӑррисене тепӗр вырӑна илсе ҫыпӑҫтарнӑ. Тепӗр енче вырнаҫнӑ вырӑсла текста та тӗкӗннӗ хайхисем, анчах пӗр вырӑнта кӑна — «(1935 г.)» вырӑнне «( 935 г.)» туса хунӑ.

Тепӗр йӑнӑш — пӗрремӗш абзацри «[и]ышӗнче» сӑмах. Ку вара, тен, чӑн та стенда ҫакнӑранпах тӑрать пуль, вӑл ҫӳлте вырнаҫнӑран ашкӑнчӑксем ун патне килсе ҫулӑхман пуль...

Чӑвашла текстра ахаль йӑнӑш та тӗл пулать: «Халӑхсен туслӑхсен орденӗпе» — пирӗн чӗлхе нумайлӑ хисеппе тӗлли-паллисӗр усӑ курманнине шута илсен «Халӑхсен туслӑхӗн орденӗпе» пулмалла. «1 тӑваткал километр ҫинче 74 ҫын пурӑнать» тесе куҫарни те вырӑслипе тӳр килместех ӗнтӗ. Чӑвашларах ҫырас пулсан «1 тӑваткал километрта вӑтамран 74 ҫын пурӑнать» темелле тесе шутлатӑп. «Административлӑ 21 район, 9 хула, хула евӗр поселок 8, 1723 ял» тенӗ абзацра та «8 хула евӗр поселок» ҫырни тем тесен те тӗрӗсрех. «Наци-культура пӗрлешӗвӗ» вырӑнне чӑвашла «наципе культура пӗрлешӗвӗ» тесе ҫырса хумалла пулнӑ.

Правительство ҫуртне пӗр кун хушшинче ҫӗр-ҫӗр ҫын хӑнана килсе каять, вӗсенчен нумайӑшӗ чӑвашла вулама пӗлеҫҫех теме пулать. Ҫӑвӑнпа та унашкал вырӑнта намӑсланас мар тесен ҫак кӑлтӑксене пӗтерсен аван пулӗччӗ. Стенда та ашкӑнчӑксен аллинчен (тӗслӗхрен, ҫине пленкӑпа витсен) лайӑхрах хӳтӗлесен аван пулӗччӗ — вӑл япала хакла лармасть, усси вара самай пысӑк (темиҫе хут юсаттармӗ). Ку ӗҫе Чӑваш чӗлхи кунӗ тӗлне тусан чӑваш чунӗшӗн тата та ытларах кӑмӑллӑ пулӗччӗ.